معكرونة بالدجاج (هادية)

-كيس معكرونة

-صدور دجاج مسلوقه ومقطعه

-بصلة وسنين ثوم نفرمن ناعم كتير 

-منقلين بشوية زبده ومنضيف الدجاج والفطر المقطع وفليفله خضرا مقطعه ناعم كتير 

- منعمل بشاميل مع شوية كريمة طبخ وتكون كتير 

-نخلط كل المكونات مع بعض مع البشاميل ومنضيف شوية موزريل

-منحط جبنة عالوجه 

- منحطن بالفرن لتسيخ الجبنه 

* صحة وهنا*

دجاج صيني (أمان)

وصفة الدجاج الصيني

المقادير:

بصلة كبيرة

صحن صدور دجاج

ملح وفلفل

فطر

جزر ، فليفلة ملونة خضراء وحمراء وصفراء

٢مكعب ماجي

كأس ماء كبير بارد

١ملعقة كبيرة مليانة نشا

الطريقة :

*نقوم بتقطيع البصلة لشرائح رفيعه ونقلبها بالزيت.

*نقوم بتقطيع صدور الدجاج مكعبات متزسطة نضعها فوق البصلة مع قليل من الملح والفلفل يكون أكثر من الملح

نقلبهم حتى يبيض لون الدجاج ونتأكد من إستوائه .

*نقطع الفطر الطازج لشرائح ، أو إذا علبة فطر نغسلها جيدا ، ونضعها فوق الدجاج ، ثم نقطع الجزر شرائح رفيعه طويلة ،والفليفلة الملونة شرائح طويلة نحيفة نضيفهم جميعا مع بعضهم ، ونقلبهم ثم نضيف ٢ مكعب ماجي.

*في كأس ماء كبير نضع ماء بارد ونضيف له ملعق النشا الكبيرة ونحركها جيدا حتى يذوب النشا تماما ثم نضعه فوق الدجاج.

*نغطي الطنجرة ونتركها على نار هادئة لمدة نصف ساعة ونشيك اذا وجدنا الماء قليل نزيد كميته.

*تقدم مع الأرز الأمريكي.

كرات البطاطس بالدجاج (أسماء)

بتحطي بطنجره بصله كبيره بتقليها ومعها تلات اسنان ثوم وفوقهم قطع دجاج مربعات صغار وقليهم ليستوو وحطي ملح وفلفل وبهار جاهز اسمه تتبيلة دجاج بس وبعدين حطي فليله تقريبا حبتين صغار

مقطعه مربعات صغيرة وجزره مبشورة 

وقليهم معهم

وبعدين صفيهم ببايركس وبتكوني سلقتي 6 حبات مقاس وسط بطاطا مسلوقه وبس تستوي قشريها وهرسيها ودوبي فوقها اصبع زبده وعجنيهم سوا

وبعدين كوريهم كرات وصفيهم فوق خلطة الدجاج وبعدين جهزي بطنجره كريمة الطبخ وعليها علبة قشطة وكاسة ماء وفيها ملعقة نشا خلطيهم لحتى يغلو وبعدين صبيهم فوق الكرات بالبايركس وحطي فوقهم جبنة موزاريلا وحطيهم بالفرن تلت ساعه من تحت وبعدين خمس دقايق من فوق 

وصحه وهنا

فتوش باذنجان (دانية)

خس - بصل قروش - خيار - مكعبات بطاطا مقلية - مكعبات باذنجان مقلية - حمص حب - خبز مقلي - (الصوص: لبن ، طحينة ، ليمون ، ثوم ، ملح )

شرائح البطاطا مع الدجاج (ميساء)

بطاطا شرائح وسط

ودجاجة كاملة 

بنحط زيت مزولا 

وملح 

عصير ليمون

ومردقوش

وعصير تفاح 

وعسل 

وبتبلون منيح وبنقعهم شي ساعة 

وبعدين بحطون بكيس الفرن 

وشي ساعة ونص او ساعتين 

والف صحة

دجاج عالطريقة التركية (ميساء)

دجاج على الطريقة التركية....

المقادير:

دجاجة كاملة

4حبات بطاطا مقطعة بشكل دوائر

كاسة عصير تفاح

2ملعقة صغيرة عسل

2ملغقة كبيرة مردكوش

عصير الليمون

ربع كوب زيت زيتون

ملح

فلفل

التحضير:

نخلط العصير مع العسل والملح والفلفل والزيت والمردكوش ونقسم الخليط الى نصفين نصف نضعه فوق الدجاجة والنصف اﻵخر  فوق البطاطا و نغلفهم ونضعهم في الثﻻجة لمدة ﻻتقل عن نصف ساعه....

نخرجهم من الثﻻجة ونضعهم في الكيس المخصص للطهي في الفرن (الدجاج والبطاطا معا") ونضعهم في الفرن لمدة ساعتين

وصحتين

كبة نية بالبطاطا (أمان)

٢كاسة برغل أسمر ناعم

 ٤حبة بطاطا مسلوقة متوسطة الحجم

 ١بصلة متوسطة الحجم

 ١حبة بندورة 

٢ملعقة كبيرة مليانة دبس فليفلة

 ١ونص ملعقة كبيرة كمون 

 ١ ملعقة صغيرة ملح

 كمشة  بقدونس مفروم وسط

الخطوات

* البرغل نضيف إليه القليل جداً من الماء ليصبح رطباً فقط و يسهل طحنه بالماكينة و ديروا بالكم البصل والبندورة كلهم ماء لهيك ماتكترو ماء ماعاد تزبط بعدين .

*نطحن البرغل في الخلاط مرتين بواسطة أنعم شفرة ثم نضيف البصل و البطاطا المسلوقة و البندورة .

*نضيف للبرغل الكمون و دبس الفليفلة و الملح و البقدونس المفروم و نقوم بعجنهم معاً بالخلاط .

* ثم نضعهم في زبدية كبيرة نقوم بتشكيل أقراص الكبة أصابع مطاولة ونضعهم في الصحن ونوزع عليهم القليل من زيت الزيتون . 

و صحتين و هنا

سلطة الشمندر (أمل)

شمندر

رمان

بصل(حطيت عادي و اخضر)

بقدونس

برغل ناعم أو كينوا

و التتبيلة: ملح، فلفل، ليمون، زيت زيتون

دجاج السبانخ بالباشاميل

تتبيلة رز اليلنجي

اليلنجي 

رز وزيت زيتون وملح وليمون وملح الليمون وقهوة ودبس رمان 

بصل

بندورة

بقدونس 

نعنع 

تنقع قبل يوم اللف وبعدا تلف والماء الزائد من الخلطة توضع وقت الطبخ

بف بستري الدجاج (أسماء)

بتقلي عالنار دجاج فيليه مقطع صغير وبتحطيله ملح وفلفل وبهارات تتبيلة الدجاج وبعدين بتضيفي جزر مبشور وفلفل رومي مقطع مربعات صغيرة وعلبة ذرة واخر شي بتحطي علبة قشطة وتلات ملاعق مليانه جبنة سائلة 

بتخلطيهم كلهم سوا وبعدين بتحطي البف باستري كل مربعه ب الصينيه تبع كب كيك بكل دائرة بتحطي وحده من البف باستري وبتفوتيها منيح وبعدين بتجيبي خلطة الدجاج وبتحطي بكل وحده شوي وممكن تحطي عالوجه جبنة موزاريلا 

وبتحطيها ب الفرن من فوق وتحت لحتى تحسيها اتحمرت واستوت 

وصحتين وهنا 

سلطة التوريتوس (دانية)

خس مقطع شرائح

ذرة مسلوقة أو معلبة مصفاة

بندورة مقطعة مربعات صغيرة

جزر مبشور

خيار مقطع شرائح طولية

فاصوليا حمراء معلبة مصفاة

رقائق دوريتوس مفتتة

**حطيت كل طبقة لحالها بالترتيب أولا الخس..... وصولا إلى الدوريتوس

**الصوص:

م ك زيت زيتون

2 م ك كاتشاب

2 م ك مايونيز

نصف علبة زبادي

عصير نصف ليمونة

م ص ملح

تمزج جيدا مع بعضها 

**الصوص يفضل وضعه قبل التقديم مباشرة مع رش جبنة موزاريلا على الوجه

خبز فينو (ضحى)

خبز الصمون (فينو )

نصف كوب ماء دافئ ملعقتين خميرة فورية ملعقة سكر بنتركهم يتخمرو خمس دقائق 

نضع وعاء للعجن أو بالعجانة أربع أكواب طحين ملعقة بكنك بودر ملعقتين حليب بودرة (أو أربع ملاعق حليب سائل )كوب لبن (زبادي)وبنضيف كوب الماء والخميرة نعجنهم 

يمكن نحتاج نصف كوب ماء دافئ أو رشة طحين حسب نوعية الطحين الموجود عندك نعجنهم بالعجانة عشر دقائق واذا باليد بدهم ربع ساعة عجن تصبح العجينة جاهزة

نضعها بوعاء ونغطيها ربع ساعة 

ثم نأخذ العجينة ونعملها رول ونقطعها عشر قطع صغار أو ثمانية كبار حسب الرغبة ونشكهل دوائر ونضعها بالصينية المبطنة بورق الزبدة أو مدهونة شوية زيت ونذوب ملعقتين نسكافيه بملعقتين حليب سائل وندهن وجه العجين ونرش سمسم او حبة بركة  ونغطيهم بفوطة المطبخ الناشفة ونتركها لمدة نصف ساعة اذا صيف واذا شتاء ساعة نضعها بالفرن المحمى مسبقاً بدرجة حرارة عالية وبالرف الوسط لمدة ربع ساعة وبس نطلع الصينية نغطي الصمون فوراً بفوطة مبلولة بالماء ونتركهم حتى يبدوا وصحتين وهنا

تشكن تكا مسالا (نور)

٦ معالق لبن 

م.ص بهارات المسالا 

م.ص كركم 

م.ص توم 

م.ص بابريكا حلوة او حارة 

م.ص زنجبيل 

ملح 

فلفل

منخلطهن وبعدين منضيف كيلو صدور دجاج مقطع مكعبات 

(ورقة غار عود قرفة ٣ حبات هيل وحبات فلفل اسود) اختياري حسب الرغبة يلي بيحب يضيف 

ومنتركهن على جنب ربع ساعة

بعدين منقليهن بمعلقتين زيت على نار هادية لتنشف التتبيلة 

الصوص :

٢ م.ك زيت 

قطعة زبدة 

بصلة مفرومة 

م.ص توم 

م.ص زنجبيل 

م.ص مسالا 

م.ص بابريكا 

م.ص كركم 

ملح 

٣ م.ك معجون الطماطم 

٥ حبات بندورة مفرومة بالبراون 

* نضع الزيت والزبدة والبصل ومنحرك ليدبل البصل منضيف التوم والبهارات ومنحرك بعدين منضيف معجون الطماطم ومنقلبهن شوي بعدين منضيف البندورة ومنغطيهن ومنتركن نص ساعة على نار هادية 

* منضيف كاسة مي ومنخلطهن مرة تانية بالبراون وبعدها نضع  الدجاج بالصوص ومنغطيهن ونتركهن على نار هادية لمدة نص ساعة او اقل 

* ثم نضع كوب كريمة ونحرك لمدة خمس دقائق ثم نضعه بطبق التقديم يمكن اضافة الماء لتخفيف القوام ( اختياري ) ونزين بالكريمة وبالبصل الأخضر او الكزبرة  

 الرز : 

٣ كاسات رز طويل 

منحط بالطنجرة معلقتين زيت ومعلقة كبيرة سمنة 

ومنضيف (عود قرفة وحبات من الهيل والقرنفل ) اختياري ومنحركهن شوي 

نضع الرز ومنقلب ليتحمص الرز شوي ثم نضع معلقة صغيرة ملح ثم نضيف اربع كاسات ونصف ماء ساخن ونتركه يغلي ثم نخفف النار ونغطي الطنجرة حتى يستوي الرز 

وبعدها نضع معلقة سمنة ونحرك نطفئ النار  ونغطي الطنجرة ونترك الرز حتى يتهدا

شيخ محشي الباذنجان (ميسون)

منجيب الباتنجان الصغير ومنحفرو ومنحشيه لحمة مفرومة محموسة مع صنوبر(انا مابحب المكسرات) وبقدونس ومنقليه متل الكوسا ومنصفو بصينية بايركس ومنجيب علبة دبس بندورة وكاسة مي مندوبن ببعض ومنسكبن فوق الباتنجان ومندخلو الفرن ومنغطيه بقصدير ومنطبخ رز مفلفل جنبو وصحتين وهنا وممكن نطبخو بالطنجرة نفس الطريقة ع نار هادية


صحتين وهنا

معكرونة النقانق (رشا)

بالنسبة للمعكرونة بالنقانق:

بتسلقي كيس معكرونة

الصلصة: 

شوية زيت و بصلة مفرومة ناعم بتقلبيهم

ضيفي النقانق مقطعة انصاف دوائر،، تقريبا ١٠ حبات نقانق

م ص ملح، نص فلفل، ربع بهارات مشكلة، نص اوريغانو

و نقلبهم شوي

نضيف: حبتين فليفلة مفرومين ناعم،  ٣حبات بندورة مفرومة، م.ك معجون طماطم، كوب ماء

و نتركها تغلي و تتعقد شي ١٠ دقايق ربع ساعة

بعدين حطي المعكرونة فوقهم و خربطي الجميع

و صبيهم بالجاط

فوقهم صبي البشاميل

اعملي بشاميل عادي.. لتر حليب، م.ص ملح، ربع فلفل، ٢م.ك طحين

و عالوش جبنة مبشورة و كعك مدقوق

بدها بالفرن شي ثلث ساعة لتتسبك على حرارة ١٨٠

و الف صحة و هنا 

كبة البطاطا (ضحى)

كبة البطاطا

كيلو و نص بطاطا مسلوقة ومهروسة مع كوبين بقسماط مع ملعقة صغيرة كلاً من ملح وفلفل وشطة وكمون بنعجنهم مع بعض 

الحشوة 

بنقلي بصل مع اللحمة مع ملح وفلفل وشطة وبس يبردو بنضيف الدبس رمان والجوز 

وبنشكل اقراص الكبة وبنقليها ب زيت حامي 

وصحتين وهنا

باستا بينك سوس (ريم)

باستا بينك صوص 

نشوح ثوم مهروس بالزبدة ثم نضيف صدور دجاج مقطعة شرائح طولية، ونقلب حتى الإستواء تقريباً ونبهرها ثم نضيف فلفل أخضر مقطع مربعات صغيرة وطماطم مهروس بالخلاط والقليل من  معجون الطماطم وملح وفلفل اسود ونتركها ٣ دقائق تتسبك ثم نضيف كريمة سائلة وجبن موزاريلا والقليل من التشيدر ونضيف المكرونة المسلوقة ونقلب، نسكبها ونضيف رشة بارميزان على الوجه.

صينية البروكلي (رشا)

صينية البروكلي

اول طبقة بطاطا مقطعه شرائح و مسلوقة 

الطبقة التانية معكرونه مسلوقة 

الطبقة الثالثة بروكي مسلوق 

الطبقة الاخيره كريمة طبخ بتتقليها بمعلقتين طحين على نار ( فيكي تضيفي لها بهارات يالي بتحبيها انا حطيت بهارات ماجي الخضار ) ليغلو بعدين بتسكبيها بالصينيه و على الوش جبنة

لحم بالتوم والصلصة (علياء)

اللحمة شوحتها بشوية زيت وملح وفلفل

بعدين طبختها على بخار الماء بطنجرة الضغط

استوت بدون ماتنشف

بقيت طرية

الخضار شوحتهم بشوية زبدة ورشة بهارات الثوم بعدين سلقتهم

الصلصة حطيت فطر طازج وصلصة كريمة الفطر من بوك جاهزة ظريفة أول مرة بجربها

البطاطا بيرية بعد ما سلقت البطاطا حطيت شوية زبدة وملح وشريحة جبنة رشة أوريجانو و رشة ريحان مجفف وبهارات الثوم وقشطة معلبة

لحم بعجين (أم عمر)

 لحم مفروم زي ماتسوي السمبوسه بس تحطي له فلفل اسود ناعم

 تسوي ظحينه تحليه في خل ومويه لحد مايصير زي ماتسوي سلطة الطحينه قوامها كريمي بس تكثري الخل شويه عشان يصير حامض

 وبعدين تكوني مجهزه الكرات ومقطع ناعم تخلطيهم كلهم مع بعض هذي هي الحشوه الي تحطيه فوق العجينه

وصحتين وهنا

دجاج الكزبرة والثوم (غيداء)

دجاج بالكزبرة والثوم

تقطع صدور الدجاج مكعبات 

تقلى بقليل من الزيت ...وملح وفلفل الى ان تنضج 

يضاف لها الثوم والكزبرة الخضراء وتقلى جيدا 

الخضار 

ارضي شوكي 

قرع اصفر 

بطاطا

جزر 

الطريقة 

تقطع قطع كبيرة 

في قدر الضغط مع قليل من الزيت ونص كاس ماء لمدة ٤ د 

وبالعافية جربوها لذيذة

محمرة (ضحى)

محمرة بالكشك 

بصلة مبروشة بنقليها بزيت زيتون حتى تزهر بنضيف خمس حبات بندورة مستوية مبروشة ملعقة دبس فليفلة حلوة أو حارة حسب الرغبة ملح وفلفل و بابريكا وبهارات مشكلة بنقلبهم عالغاز حتى يتعقد (تنشف الماء الموجودة بالخليط بنطفي وبنضيف ملعقتين طعام كشك أو أكثر حسب الرغبة وبنضيف سمسم وحبة بركة (الحبة السوداء )وبنضيف مكسرات حسب الرغبة وبنكون مجهزين العجينة وبنرق العجين بالشوبك  وبنمد الخليط عالعجين وبنشويها بالفرن أو عالصاج

شاورما عربي(أمان)

٥٠٠ غرام صدور دجاج

٣ملاعق طعام زبادي

ملعقة كبيرة خل

عصير ليمونة

ربع كوب زيت زيتون

ملعقة صغيرة ملح .كمون.بابريكا.بهار مشكل.زنجبيل بودرة.ثوم بودرة

بطاطا مقلية أعواد رفيعة

مخلل مقطع طولي

خبز صاج

الصوص للساندويتش :

٣ملاعق كبيرة زبادي

ملعقتين كبيرة طحينة

ملعقتين كبيرة عصير ليمون

نصف ملعقة صغيرة ملح

ملعقتين ماء

٣ فصوص ثوم

الطريقة :

-تقطع صدور الدجاج لشرائح طويلة ونحيفة ونتبلها وندخلها الثلاجة قبل بيوم أو على الأقل قبل ٤ ساعات من الطبخ.

-نسخن المقلاة على درجة حرارة عالية ونضع الدجاج مع خلطاه ونقلبه وندعه حتى يستوي تماما ويتحمر وينشف ماؤه 

-نفرد خبز الصاج ونع عليه الصوص المعد مسبقا ثم نضع المخلل ثم البطاطس المقلية ثم الدجاج .. ممكن اضافة ماتحبون على ذوقكم 

-ثم نلف الساندويتش جيدا ونضعها على السخانة حتى تتحمر من الجهتين ثم تقطع مربعات .. وألف صحة وعافية

محمرة نار (أسماء)

فليفلة حمرا طحنتا بمحضرة الطعام مع شوية ملح حسب الرغبة

بحمص ملعقتين كزبرة ناشفة

وملعقتين كمون

وملعقتين يانسون

وملعقتين شمرا

بطحنهم لحتى يصيرو ناعمين وبحطن فوق الفليفلة 

بحمص شوية حبة سودا وبحطها فوقن وشوية دبس رمان وسمسم محمص وبغمرها بزيت زيتون حتى نخفف من الحد

ومأكول الهنا

برغل السبانخ (ميسون)

حزمتين سبانخ مغسولين ومفرومين خشن 

بتحطي بطنجرة زيت زيتون كاسة ومعها بصلة صغيرة مفرومة ناعم وتوم مهروس تقريبا راس وكزبرة ناشفة وبتقلبيهم كلها مع بعضها لتدبل بتحطي السبانخ وبتحركي ليبلش يطالع ميتو ويدبل بتجيبي كاسة برغل خشن بتحطيا معا وبتقلبي ليشرب البرغل المي وبتحطي كاسة مي وملح وبتتركيه ليغلي بتهدي النار ع الاخر بتكوني فرمتي حزمة صغيرة كزبرة خضرا بتحطيا معن وبتغطي وكل شوي شوفي بيحتاج مي او بكفي وصحتين وعافية وجنبو لبن وجرحير ومخلل كتير طيب وصحي

متبل حموي (ميسون)

سهل كتير بتجيبي باتنجان مشوي وبتخلطيه مع لبن وتوم ونعناع وطحينة وملح وبتسكبي بجاط التقديم وبتكوني جبتي لحمة مفرومة بطنجرة فيا زيت وبتحمسيهن مع ملح وبهار ليستوو بتحطي دبس بندورة يعني معجون طماطم تقريبا ٣ ملاعق وبتحمسيهن مع اللحمة بتحطي عليهن مقدار نص كاسة مي ليتسبك مع بعض بتحطيهن فوق المتبل وبترشي ع الوجه بقدونس مفروم ورمان وصحتين وهنا اكلة سريعة

عجينة (رشا)

3 اكواب طحين 

ملعقة كبيرة خميرة

ملعقتين كبيرة سكر 

نص كوب زيت 

كوب حليب سائل

رشحة ملح 

نعجنهن مع بعض ، ونخليها ترتاح (15-20) دقيقه

سلطة الأفوكادو بالدجاج (أمان)

مقادير سلطة الأفوكادو بالدجاج

- الأفوكادو : 1 حبة (مقشر ومقطع شرائح)

- صدر الدجاج : 2 صدر (فيليه)

- الجرجير : كوب (مفروم)

- الطماطم الكرزية : كوب (مقطعة أنصاف)

للصلصة:

- ربع كوب من زيت الزيتون

- ملعقة ونصف من خل التفاح

- ربع ملعقة من الخردل

- ملعقة من عصير الليمون

- ملح وفلفل حسب الرغبة

صحتين

بيتزا ألفريدو (رشا)

جبنة كريمية بدال صلصة البيتزا

وعلى الوش قطع دجاج بتبلهن مع الفطر

وآخر شي أوريغانو وجبنة 

سودة الدجاج (ضحى)

سودة دجاج 

بعد التنظيف نضعها بالطنجرة ونضع فوقها الماء و ورق غار هيل حب وقرفة عود  وبس تطلع الزفرة يعني من أو غلوة فوراً بنحطها بالمصفاية وبنغسلها منيح بنكون مقليين بصل كتير حسب الرغبة وتوم مقطع وفليفلة ملونة و حبتين بندورة ودبس فليفلة بنضيف السودة والباقة العطرية (ملح وفلفل وهيل ناعم وكم حبة هيل وقرفة وزنجبيل وبهارات مشكلة ورشة خفيفة بهارات الكبسة ورشة كاري بيعطوها نكهة لذيذة ورقتين غار )وبنتركها على نار هادية حتى تنضج 

بالعافية

فلافل الفرن

غراتان البطاطا واللحم

www.instagram.com/p/BwWgVG5nJK5/?igshid=bz4xxriuztrm

سلطة بالتونا والبطاطا والمعكرونة (غيداء)

بطاطتين 

كمشتين مكرونه 

بتسلقيهم 

على الوجه اختياري 

ام شرائح دجاج او تونه 

فوقها جبنة موزريلا مبشورة 

كمشتين بقدونس 

وللصوص 

ملعقتين مايونيز عصر ربع ليمونه ١/٢كوب ماء رشة ملح 

ترش فوق المقادير 

ملاحظة 

ممكن وضع شرائح بيض مسلوق على الوجه حسب الرغبة 

او ذرة 

وصحة وهنا 

تعتبر وجبة متكاملة 

جربوها لن تندموا

زهرة بالحمة (ميسون)

زهرة 

الحمة 

التوم 

الطحينة 

الليمون

ملح

فلفل

 وجنبا رز ابيض

تشوروز (نور)

تشوروز

كوب ماء

ملعقتين كبيرة زبدة

ملعقة صغيرة فانيليا

ربع كوب سكر

نضعهم كلهم معزبعضهم عالنار حتى تغلي المي وتذوب الزبدة

نضيف عليهم كوب دقيق ونحركهم يصير عنا متل العجينه نتركها تبرد اكتر من نص ساعه لنتاكد انها بردت منضيف اول بيضة ومنحركها منيح بعدين منضيف تاني بيضة ومنحركها منيح 

بيصير عنا متل عجينه بس الها ملمس ناعم وبيلزق بالملعقه

بتجيبي كيس  المريمة وبتحطي راس على شكل نجمة 

وبديت غزير شوي منشغل على نار هادية وبنزل من الراس اصابع طويلة شوية ومنقصها بالسكسن او المقص

منقليهم كلهم لتخلص الكمية

ممكن تحطيهم بسكر مع قرفة وتاكليهم

او ممكن مع النوتيلا او شوكولاته مدوبة

وصحتين وهنا

جدي بزيت (غيداء)

بسلق اللحمة وبعدين بصفيها من المرقة وبقليها بالزيت قلي خفيف مو قلي غمر 

وبحطهم بالبيركس او صينية وبحط عليهم الصوص وبدخلهم الفرن حوالي ربع ساعة   

طريقة الصوص

بحمص شوية طحين وبحط عليهم مرقة اللحمة مع عصير ليمون وتوم مدقوق وزيت زيتون 

بيتقدم معها رز بالشعيرية او بطاطا مقلية وموضوعة بنفس الصوص تبع اللحمة 

والف صحة وهناااا 

تتبيلة الدجاج (ضحى)

ملح وفلفل أبيض وأسود وزنجبيل وقرفة وهيل وبابريكا و كزبرة يابسة وخل ولبن وزيت نباتي رشة من شان اللمعة

وصحتين وهنا

كبة بدون لحمة (سمية)

كبة بدون لحمة:

نص كيلو برغل ابيض 

نص كيلو برغل اسمر

نص كاسة سميد

بصلتين 

حبة بطاطا وسط اقرب للصغيرة (نية)

بنغسل البرغل وبنصفيه وبنحط عليه بقية المقادير وبنحط ملح 

وبنحطهم بماكينة الكبة 

اثناء طحنهم حنحتاج نحط مي بحيث ما تكون العجينة ناشفة ولا مسقسقة

بنطحنهم 3 ادوار او 4

وبس بالعافية

البيتزا الغيدائية (غيداء)

اطيب صلصة بيتزا انا براي التالية 

بتطبخي بصلة +بندورة +فليفلة +بزيت الزيتون ..مفرومين بمحضرة الطعام 

( الفطر ) ايضا

وبعدما تنطبخ وتتبخر مرقتها وصارت جاهزة ....اتركها جانبا 

على العجينة 

بحط شرائح جبنة 

ثم الصلصة المطبوخة ثم بقطع شرائح ناعمة من البندورة والفلفل والبصل الاخضر والزيتون ترص فوق الصلصة المطبوخة ثم ترش بالبهارات الايطالية والاوريغانو ....وبالفرن نشويها من تحت ومن فوق 

وبعد ان تنضج نرشها بالجبنة ثم نعيدها للفرن لمدة ٥ دقائق 

هي اطيب بيتزا 

جربوها ما بتندموا

بعض الاحيان احشي الاطراف بالجبنة

صحتين وهنا

أطباق مالحة مميزة