دجاج بالزعتر والكريمة ( هيدو )

صدور دجاج فيليه منقطعها مكعبات و منتبلها بملح وفلفل و أوريجانو و قرفة و بودرة بصل كزبرة يابسة و شوية زيت

بطنجرة البخار منحط ماء 

و منحط الدجاج بمصفاية مرتفعة عن الماء

منضغط الدجاج لمدة ٤٠ دقيقة

بيستوي الدجاج ببخار الماء

منقطع بصلة صغيرة جوانح

منقلّيها بقليل من زيت الزيتون حتى تذبل 

منضيف عليها فليفلة ملونة مقطعة جوانح

منضيف قليل من الملح

بعدين منجهز الكريمة.. كريمة طبخ نصف كوب حليب + ملعقة طحين + ٢٠ جرام زبدة + جبنة لها نكهة و بتذوب ( أنا استخدمت جبنة فريكو)+ ملح

في صحن بايريكس

منخط الدجاج بعد ما يستوي

فوقه طبقة الخضار (البصل+ الفليفلة)

بعدين منضيف الكريمة

مندخلها ع الفرن نصف ساعة على أخفّ درجة حرارة

بالآخير رشة جبنة ( قشقوان) و منشغل الفرن من فوق حتى تذوب

تقدم بجانب أرز أبيض سادا

و صحة وهنا🤗

الفطيرة الهشة

شاورما مستحدثة ( نور)

الطبقة الاولى مكعبات بطاطا مقلية

الطبقة الثانية دجاج على النار مع زيت وملح وفلفل وبهارات مشكلة (ممكن اضافة بصلة صغيرة قبل وضع الدجاج)

الطبقة الثالثة جبنة كاسات + جبنة موزوريلا ( ممكن اضافة قليل من القشطة المعلبة) 

وتحمر في الفرن ١٠ دقائق من الاعلى

وصحة وهنا

دجاج بالصينية ( سمية )

صحن دجاج فيليه مع بصلتين مع بقدونس وسن ثوم 

مع دبس رمان ودبس فليفلة حده (اذا في دبس فليفلة شغل بيت وممكن بدالها قرن فليفلة حده) مع ملح وبهارات وشوية زيت زيتون بتخلطيهم بفرامة البصل كلهم

بعدين ادهني الصينية بزيت زيتون وافردي الدجاج فيها وحطيها بالفرن (انا فرني كهربا بشغله من فوق وتحت وبحط الصينية تحت)

انا وزوجي بنحبها تكون طبقة رقيقة وكل واحد ع زوقه

بس تقرب تستوي بطالعها وبحط عليها شرائح بندورة رفيعة مقشرة 

ويقدم معها لبن بطحينة وملح وليمون

دجاج بالبهارات والجنبة ( هيدو )

هلا غسلت الصدور وصفيتت وصرت جرحن حط بالفراغات شرائح ثوم وجبنة قشقوان

 بعدين لالخلاط حطيت شي بصلة وشوية توم و6-7 بندورات وسط مع ملح فلفل بهارات مشكلة بهارات فاهيتا شوية خل شوية زيت بودرة بصل شوية بهارات ايطالية فين اوريغانو وفرمتن ودعكت فين الجاجات وغطيتن بقصدير وحطيتن بالفرن

حطيت كل شي بهارات بتلبق حطيت نص معلقه صلصة بيتزا وعصرة صلصة تكا ماسلا

 وعالوش جبنة موزاريل وقشقوان وشيدر

طريقة عمل السوشي ( أم غيث )

بسلق كاسة رز و بضيف عليها معلقة خل الرز او خل ابيض ومعلقة صغيرة ملح ومعلقة صغيرة سكر 

مدي ورق السوشي (النوري) على نايلون وفوقه مدي طبقة رز رقيقة والحشوة يلي بتريديها ممكن كراب مع خيار او بصل اخضر او سالمون مع منغا او افوكادو بس كله شرايح رقيقة ورفيعة ومنلف النايلون وبترصي منيح واتركيه بالبراد ليتماسك وبعدين بتقطعيه ويقدم جانبه صويا صوص والف صحة

ستروناغوف باللحم ( بنان وبشرى)

ستروغانوف لحم

بصلة صغيرة 

نصف كيلو لحمة شرحات بتقطعيها شرائح طولية 

قلي البصل  بزيت الزيتون واللحمة وبتضيفيلها ملعقة خل واتركيها لتستوي تماما

بتضيفيلها مقدار كوب فطر  وقلبيها

بوعاء منفصل 

2ونصف كوب حليب

2 ملعقة كبيرة كاتشب

2 ملعقة كبيرة صلصة باربيكيو

1 ملعقودة صغيرة خردل

2 ملعقة كبيرة نشا

2 ملعقة كبيرة صويا سوس

1 ملعقة صغيرة ملح

ونصف ملعقة فلفل

اخلطي المقادير جيدا وحطيها فوق اللحمة 

اتركيها تغلي كم غلوة وصحة وهنا

ملاحظة: خليك دقيقة بالمقادير

هي الأكلة بالذات اذا قدرت تقدير بتخرب النكهة تماما لأن فيها شي حامض وشي حلو

وصحتين

طريقة ثانية 

قليت اللحم بعدين قليت الفطر  و توم وبصل وكلن بعدين بطنجرة الضغط شوي عالنار وعملت بشاميل 3ملاعق زبدة وقدن طحين و اخدت بدل الحليب  من مرقه  اللحمه شي كاسه و بعدين حطيتا فوق الخليط كلو و تركتا وتقعد سوى والبهارات ملح وفلفل و بهارات مشكله وفلفل ابيض كتير طلعت طيبه و جنبا رز 😍

متبل الباذنجان ( ميسون )

تشوي حبات الباذنجان ... تضيفي الطحينة واللبن والثوم و الملح والليمون وتخلطيهم مع الباذنجان بعد تقشيره 

تضيفي له البقدونس والفلفل الأخضر والرمان 

صحة وهنا 

شاورما الدجاج البيتي ( بشرى )

الشاورما   : لكل نص كيلو صدور جاج مقطعه شرائح طوليه نحتاج فنجان قهوة  زيت زيتون-فنجان قهوة خل ابيض -فنجان قهوة عصير ليمون -ملعقةهيل  حب- ثوم

ملعقة ملح - نص ملعقه فلفل اسود- ليمونتين مقطعه شرائح رفيعه- ملعقه كبيرة بهارات الشاورما 6فصوص توم  مهروس - زبديه لبن وانا بحط معها شقفه صفيرة دهنه مفرومه بتعطيها نكهة طيبه ومابتنشف- بنقع الجاج ليله كامله بالتتبيله ولك الحريه اما تحطيها باافرن او ع طنجرة ع النار خدي الدهنه و خليها تسلى عالنار و  نزلي الشاورما و ع النايص بتكوني عملتي المتومه انا بساويها من البطاطا بسلقها تمام و بقشرها وبااخلاط مع لبن و طحينه و ملح و عصير ليمون وخل و بركزها بالدواقه  ماتكون كتير مريقه و المخلل و خبز التورتيلا .  و طبقي سندويش عالسخانه وصحه وعافيه

سلطة الجرجير ( أمول )

المكونات:

جرجير

بندورة

بصل أخضر(لو مو متوفر ممكن بصلة صغييرة مفرومة ناعم)

يتبل مع خل وليمون و ملح و زيت زيتون (دوقيها حتى تزبط النكهة)

نضعها بطبق التقديم

ثم مكعبات جبنة فيتا

رشة سماق

حب رمان حامض

و صحتييين😋

تميس بالجبن

يقطين طويل بالباشميل ( ميساء )

بقشر اليقطين وبقطعو بطول 

وبالملعقة بنفضي البزر

بعدين بنسلقو بالمي وشوية زيت وملح

لحتا يستوي بدو اكتر من نصف ساعة بشوي 

الحشوة

لحمة مفرومة وانا برشت الجزر 

طبعا ملح وفلفل

بتصفيها بالبايركس وبتحطي الحشوة 

وبتكوني مجهزة البشميل وانا ضفتلها نصف كوب كريمة طبخ وجبنة قشقوان جواتها بعدين سكبتها ع  القوارب 

طبعا جنبها رز امريكي ابيض سادة 

وصحتين

دجاج مع الخضار واليقطين أو القرع ( الغيدائي )

دجاج مع الخضار

نقطع الخضار بشكل طولي أحجام كبيرة نوعاً ما الخضار اللي استخدمتها

بطاطا (مقليه )

بصل

جزر 

فليفلة 

فطر فريش 

قرع

بصينية الفرن وضعت قليل من الزيت ونبدأ بتقليب الخضار على النار ونضع قطع الدجاج فوقهم بعد التفوير عليهم وإزالة الزفرة نرش الملح الفلفل فليفلة حمراء يابسة ناعمة  نضع الماء ونغلفها بالقصدير بشكل كامل 

وعلى الفرن إلى أن يستوي

كرات اللحم مع البطاطا

كفتة اللحم أو الدجاج مع الخضار ( بشرى )

 الجاج صدور ع الماكينه بعدين حطيت ملح وفلفل  وبودرة التوم وبهار مشكل يعني ع كيفك و شرحات بصل و شرحات بطاطا وفليفله و بندورة وبهرتن وملحتن  وصفيتن و 5بندورات خلطتن ع الخلاط  وصفيتن وحطيت معها بهارات دجاج و ع الفرن

غمرتها بالماء 

لك الخيار بوضع قليل من صلصة الطماطم 
تحتاج من ساعة ونصف إلى ساعتين 

 فيكي تحطي لحمه بدل الدجاج و تبهريها ملح وفلفل وبهار ابيض

بامية بالزيت ( أم غيث )

قلي بصل جوانح وتوم مقطع وبعدين البامية وبعدين فليفلة ملونة وبندورة مقطعة ودبس رمان وعصير ليمون والف صحة 

(يفضل تكون البامية كبيرة )

عدة طرق لطهي الدجاج

طرق لتحضير الملفوف

طريقة اعداد الملفوف المحشي 

هناك طريقة مستحدثة وهي أن تضعي راس الملفوف بالفريزر لمدة يومين ...

وقبل الطبخ بليلة نخرجها من الفريزر ..

ونعد الحشوة ..

ثم أطبخه بقدر الضغط ...

أو قدر عادي ويحتاج إلى زمن أكثر بقليل 

طريقة أخرى 

أن أقطع في الوسط ...

وأضعه بقدر كبير فيه ماء مغلي وعلى النار إلى أن أنهي الكمية كلها  

وأنتزع الورق واحده تلو الأخرى 

كما في الفيديو

طريقة أخرى تاخذ وقت أطول 

نقوم بنزع الأوراق واحده تلو الأخرى 

ونضعها في قدر به ماء يغلى وعلى النار أنزل الورق حتى ينتهي كله 

ملاحظات على الطريقة الأولى : الورق يخرج الورق تلقائي ... يكون مطاطي ... طريقة موفرة جدا للوقت والجهد 

هل جربتي اللف بشكل المثلث ؟

العدجينة القطنية ( بشرى )

  العجينه القطنيه 4كاسات طحين و1كاسه حليب بودرة 2ملعقه كبار سكر -2ملعقه كبار خميرة - نص كاسه زيت ورشه ملح - وماء فاتر للعجن تخمر ساعه  و تستعمل كتير خفيفه وهشه اظن من الحليب البودرة

لحمة بالصينية ( بشرى )

لحمة ناعمة ضأني ... بصلة صغيرة ... حبتين طماطم صغيرة ....ملح فلفل قليل .... شرائح بطاطا 

تقشر البطاطا وتقلب بقليل من زيت الذرة .... وترص على السطح اللحمة المضاف لها البصلة والطماطم والملح والفلفل ... وتوضع شرائح الطماطم على الوجه وتدخل في فرن لمدة ساعتين 

يمكن الاستعاضة عن الطماطم بلبن وطحينة على الوجه 

وتقدم مع السلطة والليمون 

صحة  وهنا 

دجاج بالصينية ( سحر )

 هي لحمة جاج مطحون ونفس تتبيلة اللحمة بلصينية بس جاج يعني بحطلا دهنة وبصلة صغيرة  كمان مشان تطراوتحتها شرحات بطاطا كتير طيبة

مدفون الدجاج

الفطيرة التركية (امول )

الفطيرة التركية🇹🇷

العجينة:

٢كوب طحين

ملعقتين صغار سكر

ملعقتين صغار ملح

ملعقتين صغار خميرة

كوب حليب سائل دافي

👈🏼 نعجن العجينة و نتركها ترتاح

الحشوة:

نقلي بالزيت بصلة مفرومة ناعم مع سنين ثوم و ثلث كيلو لحمة ناعمة حتى تستوي 

نضيف حبتين بندورة و حبة فليفلة مفرومين ناعم + كوب ذرة+ ثلاثة ارباع ملعقة صغيرة ملح و ربع فلفل و ربع بهارات

و نتركها تغلي على نار هادئة حتى تتعقد و تتنشف

بصينية الفرن المدورة:

افردي نصف العجينة

ضعي الحشوة

ابشري جبنة شدر و موزاريلا

افردي باقي العجينة و حاولي غلق الاطراف على بعض

ابشري فوق العجينة جبنة موزاريلا و شدر

و رشي حبة البركة

على فرن حامي ١٨٠ لمدة ربع ساعة ثم يحمر الوجه

و صحتيين😋😋

بندورة محشية بالسبانخ ( أمول )

🍅🌿 الطريقة: 

قلي بصلة كبيرة مفرومة ناعم مع ٣ سن ثوم و ملعقتين اكل لحمة ناعمة و نص م.ص ملح و نص فلفل

ثم اضيفي ٤-٥ أكواب سبانخ مغسول و مفروم و قلبي حتى يدبل السبانخ شي ١٠ دقائق

اطفي النار و اضيفي جبنة موزاريلا مبشورة و ربع كوب كريمة و ملعقة كبيرة جبنة كاسات

اغسلي البندورة و اقسميها من فوق و فرغيها بالملعقة

صفيهم بالبيركس

و رشي عالجميع ملح و فلفل

احشيها بخليط السبانخ

جبنة عالوش

يضاف لها كأس ونصف ماء ومكعب ماجي 

بالفرن حرارة ١٨٠ لمدة ثلث الى نصف ساعة

حسب قديش بتحبي البندورة طرية و مستوية

👈🏼 ممكن تعتبر مقبلات و تؤكل لوحدها.. حطي بس رشة مي بالجاط

ممكن لو حبيتي تعتبريها اكلة مع رز حطي كوب ماء و نص مكعب ماجي بصير الها مرقة و قدميها مع رز

و الف صحة و هنا😃

فول مدمس ( أم عبد الله )

فول مسلوق أو معلب .. طماطم ...7-8 فصوص ثوم ...بصلة صغيرة ناعم ... بقدونس .... ليمونتين .... زيت زيتون 

وحمص حب مسلوق حسب الرغبة 

يهرس الثوم ويضاف له الثوم ويقلب جيدا والبصل ... ثم يضاف له الفول الساخن ... ويقلب جيدا ثم يوضع على السطح طماطم مقطعة ويرش بالزيت كمية كبيرة 

ولبن وطحينة حسب الرغبة على السطح 

صحة وهنا 

فطيرة مقلية

دجاج بالكاري ( ألاء )

دجاج بالكاري : 

١_دجاج مقطع مكعبات /فطر /بصلة كبيرة مقطعة ناعم /ثلاث فصوص توم مفروم/ وزنجبيل /وملعقة كبيرة كاري /ملعقة كبيرة ملح /ملعقة كبيرة لبن /٣ملاعق رب البندورة /ملعقة صغيرة هيل /ملعقة صغيرة توم بودرة —�>نقلي كل المكونات مع بعض بزيت لحتى تستوي نضع كاستين مي ومنغطي الطنجرة لحتى تغلي .

وصحتين وهنا

بطاطا محشية

طرق لتزيين أطباق التقديم

عجينة سريعة ( ناهد)

   بستعمل   2كوب  طحين    وبيضة و3/4  كاسة زيت  وملعقتين ونص  خميرة  فورية    وبيضة   جربيها  بتطلع خفيفة وهشة

عدس بحامض ( حمصي )

العدس بحامض عبارة عن ٣ كاسات عدس اصفر مع ٦ كاسات ماء وبتغسلي العدس منيح وبعدا بتحطيه ع النار ليغلي بتشيلي الرغوة عنو وبعدا بتحطي التوم وبتتركيه مع بعض يستوي وبعدا بتحطي ليموون وملح ع حسب الرغبة وبتتركيه يغلي ع الوسط لحتى يبلش يسمك وبعدا بتطحنيه بالمكسر وبترجعيه ع النار وبتحطي عليه شي نص كاسة زيت زيتون ع البارد وبتتركيه خمس دقايق يغلو مع بعض وبعدا بتقدميه مع خبز محمص وصحة وهنا😋😋

مناقيش على الصاج

 مو خبز.. عجينة ..بسيطة.. كتيير.. طحين ومي دافية وملح وسكر.. بدون خميرة.. عجنتها وتركتها اكتر من ساعتين ارتاحت. وبعدين خبزتها مناقيش عالصاج..

تلات كاسات طحين.. وملعقة ملح وملعقة سكر. واذا حبيتي شوية زيت للطراوة.. ومي دافية للعجن واعجينهم منيح واتركيها ترتاح في مكان دافي انا خليتها ساعتين بترتاح وبتقطعيها كرات حسب الحجم اللي بدك ياه.. ورقيها كتير لازم تكون رقيقة وحطيها عالصاج لما بتسخنيه واخبزيها عالوشين بعدين حطي الزعتر او اي خلطة بدك ياها من المناقيش..واتركيها دقيقتين وبس...

التبلة أو التبولة التركية ( ميسون )

التبلة هي عبارة عن تبولة تركية

 يعني نفس خضار التبولة تبعتنا بس البرغل اكتر وبكون برغل اسمر ناعم وبدل ماتحطي ليمون بتحطي دبس رمان

عجينة الكبة ( غيداء )

المقادير 

كل كاس برغل ناعم يضاف له ثلث كاس لحم مفروم وملح وفلفل وشريحة صغيرة من البصل 

الطريقة 

يغسل جيدا البرغل ويترك عليه أثر الماء ويترك لمدة نصف ساعة 

يضاف له الملح والفلفل واللحم المفروم ... ويمرر عبر المفرمة 

يعجن جيدا ويضاف له قليل من الماء أثناء العجن حتى يصبح متجانس 

يشكل بالأشكال المناسبة أو يعمل به عدة أنواع 

كبة مقلية 

كبة بالصينية 

كبة مبرومة 

كبة مسلوقات 

كبة لبنية 

كبة مشوية 

كبة على السيخ 

كبة صاجية

كبة سفرجلية 

كبة حميص 

صحة وهنا 

كبة مسلوقات ( غيداء )

أقراص كبة مثل الكبة المقلية تماما ونفس الحشوة ( لحمة وبصلة مقلية ) 

تسلق أقراص الكبة في ماء وملح لمدة 5-7 دقائق حتى تنضج 

تنزع من الماء وتوضع في جاط بايركس 

يترك حتى يبرد 

يصب عليه لبن زبادي مضاف له ملح محرك جيدا 

يصب على الكبة ويرش بزيت الزيتون وحبات الجوز ويزين بالبقدونس 

ملاحظة : يمكن طبخ أقراص الكبة على البخار حتى تنضج 

وترص ... وتغطى باللبن 

ألف صحة 

كبة مقلية ( غيداء )

كبة بالصينية ( غيداء )

كبة مبرومة ( غيداء )

المبرومة 

للبرم طريقتين 

الاولى :الاصوليين 

على مفرش سفرة او شاشية مبلولة 

بتمدي الكبة طبقة متوسطة السماكة طويلة بعرض ١٠سم على الاقل وبتمدي الحشوه بالوسط بحيث لا تصل الى الاطراف ....وبعدها بتلصقي الحافتين على بعض مع البرم وبعدها بتصفيها بالصينية مدهونة سمنه وزيت وبتدهني السطح ايضا بالسمنة وبالفرن 

الطريقة الثانية المبتكرة 

الاسطوانات من الجهاز ......بطول ١٠سم تقريبا او بحسب الرغبك ممكن اطول ....وبحشيها من فوق واقلبها واحشيها من الطرف الثاني وبالصينية 

ملاحظة 

كتير مهم اللحمة المقلية مع البصلة ان تكون مفرومة جيدا ووليست متكتلة .....حتى تمر اللحمة بسهولة ونمليها منيح والف صحة

مقلوبة الخضار

منزلة أسود ( مسقعة باذنجان ) طوبى

منزلة أسود 

باذنجان حبة صغيرة ...مقشرة ... مقلية ...

بصل مفروم مقلي مضاف له لحمة مفرومة ثم إضافة الملح والفلفل .... وتقلى جيدا 

تحشى حبات الباذنجان المقلية وترص في طبق ويوضع عليها الماء والملح ... وتدخل في فرن لمدة ساعة أو على النار إلى أن تتسبك ( تتعقد ) 

ملاحظة : يمكن إضافة شرائح الطماطم لها ويمكن أيضا إضافة الصنوبر أو اللوز 

صحة وهنا 

قرع محشي ( طوبى )

بتجيبي يقطينة حمراء صغيرة وظريفة وبنت عالم وناس 😎 المهم بتجيبي يقطينة اول شي بتقطعيها من فوق على شكل مثلثات صغيرة ليطلع شكل حلو وبتفرغيها واسهل شي لتفريغها بالملعقة بس تخلصي بتدوبي زبدة وبضيفيلهن توم وبتدهني اليقطينة كلها من جوا ومن برا وبتتركيها عجنب 

بتجيبي كاسة برغل بتغسليها وبتحمصيها مع رشة زيت زيتون وملح وقرفة مطحونة وبتطبخي البرغل وبتشيليه ع جنب

بتجيبي لحمة ستيك مقطعتيها طرنشات بتقليها مع ملح وفلفل بس تستوي بتشيليها كمان ع جنب هلأ بتجيبي اليقطينة يلي داهنتيه وتاركتيها تقريباً شي ساعة بتحطي اول طبقة تلت ارباع كمية البرغل بعدين كمان تلت ارباع كمية اللحمة وبتسكري غطا اليقطينة بتجيبي قصدير وبتلفيها طبقتين وبتحطيها بحمام مائي وعالفرن تقريباً بدها ساعة استوا وبس تستوي بتطلعيها من الفرن وبتقدميها اما صحيحة بتقسميها عالسفرة وبس تقسميها بتضيفي كمالة كمية البرغل واللحمة وعالوش جوز وصحتين وهنا 

ملاحظة 

اذا بتحبي ضيفي رشة طحينة عالوش فوق الجوز هيك الوصفة الأساسية بس انا ماضفت خفت مايحبوها 😉وصحتين والف عافية

فطيرة دجاج بالبف باتيسري (بشرى )

 دجاج بالبف باستري: كيلو دجاج و عبوتين من رقائق البف باستري- الدجاج يقطع شرائح و ننقعو بالخل والملح شي عشر دقائق بعدين منشطفو منكون بهالوقت فرمنا بصله كبيرة ناعم - 5 فصوص توم مهروس- عبوة فطر معلب او الأخضر بحسب الموجود- 6 جزرات متوسطات مكعبات ناعمة- نص عبوة ذرة - نضع ع النار طنجرة مع ملعقتين كبار زبدة نشوح البصل و التوم ثم نضيف الدجاج ونقلب ليتغير لونه ثم نضيف هيل ناعم و زنجبيل اخضر مبشور - مقلب و نضيف باقي  المكونات بالتدريج مع اصافه ملعقتين كبار كاري -  ملعقه زنحبيل بودرة - بهارات الدجاج ملعقتين  وملعقه ببريكا-مع اضافه كاسه حليب او نص كاسه كريمه الموجود- انا بحب هالتشكيله وفيكي تضيفي اي بهارات  بتفضلوها - البايركس يدهن  بالزبدة فقط بقاع البايركس نضيف شرائح البف  باساري نفرد كل وحدة منن جيدا بالشوبك بتتمدد كتير هيي مندخلا ع الفرن بس لتتفتح شوي - ثم بتطلع منستناها لتبرد  و منوزع باقي البف ع الأطراف و نترك  شوي منن لنسكر الوش ثم نضبف  خلطه الدجاج  و منقفل السطح و منقطع الفطيرة و مندخلا الفرن من فوق وتحت سوى - ملاحظتي بس تدخل الفرن  العجينه قبل مانحط  خلطه الدجاج فوقا مابتلزق بالبايركس و بتقرمش اكتر -

لو غير موجودة البف عنكن رقائق البقلاوة  الجلاش - بس ساعيتا بدكن بس تقفلو تحطو كاسه حليب مع بيضه مخفوقين يوة ع وشها منشان ماتنشف

يقطين باللبن (بشرى )

 اليقطين منقطعها ومنقليها و منهما خلطه لبن وطحينه و عصير ليمون وسنين توم و كان ونعنع ناشف مناسب  اليقطين بعدين منحطو بالبايركس وفوق و عليك اللبن و منغمرو بالمي و منحطو بالفرن ليتعقد هيك بيطلع كل حبه بحبه مابيفرط ابدا لحمة مفرومة على الوجه

قداما رز او برغل  افضل واخف

رز بفول ( رؤى )

الرز بفول 

اول شي بتنقعي الرز 

بعدين بتحطي تقريبا ربع كوب زيت مازولا لحتى يحمى منزل فيهون الفول ومنحركهم تقريبا 5د هلئ كمية الفول تقريبا نص كاسات الرز يعني 4 كاسات رز بدو كاستين فول .. 

بعدين منحط فوقهم النصبة هي عدد كاسات الرز وزيادة كاسة يعني تقريبا 5 كاسات مي ..

منستناها لحتى تغلي المي منحط الملح معلقة كبيرة تقريبا و معلقة صغيرة فلفل وحبات الهيل بتعطي طعمة كتير طيبة و بعدين منسقط الرزات بعد ماتغلي المي  ومنحركها ومنخليها للتتهدا ..

بس ينشف المي تماما من نحط معلقة كبيرة سمنة بالمقلاية مندوبها ومنحميها .. بعدين منفتح الطنجرة الرز  ومنكت السمنة فوقها ومنسكر الطنجرة بعد شي عشر دايق منفتحها ومنحركها .. 

هلئ اللحمة حطيت معلقة سمنة وقليتها مع فلفل وملح واخر شي سكبتها فوق الرزات .. 

وقليت المكسرات ع الوش 

وصحة وهنا

داوود باشا معدل ( ميسون )

 هي كرات لحمة مدعبلة مبهرة ومقلية

 وبتحطي معا بعد ماتقليهن بصلة وفليفلة ودبس بندورة وانا بحط فطر وبزاليا مشكلة وسنين توم وبخلين يطبخو مع بعض ع الهادي

 وجنبن رز كبسة مبهر خفيف ابيض

سلطة الشوندر ( طوبى)

سلطة شوندر 😋😋شوندر وليمون وتوم وبقدونس وزيت بلدي

جمبري بالكريمة ( بنان )

جمبري بالكريمة

بتقلي البصل بزيت زيتون وبتضيفي عليه الجزر المبشور

بتقلبي وبتضيفي الجمبري 

رشة ملح ومعلقتين كبار سوياسوس و٣ ملاعق خردل

بتقلبي وبتضيفي شوية حليب ومعلقتين طحين والكريمة 

وصحتين وهنا

لحمة شرحات بالفطر والكريمة والبركلي بجبن المزريل والبارمازان ( ميساء )

بنسلق معكرونة فتو تشيني وبنحطها بالبايركس اول طبقة

وبصلة مفرومة ناعمة والفطر نقلبهم بزبدة

وبالاخر بنضيف البركلي مع البهار الايطالي

وبعدين بنضيف علية كريمة الطبخ الوسط مع التحريك ونضيف جبنة البارمزانوالمزر​يل

ونتركها ع الناتر خفيفة حتى تتماسك

واللحمة الشرحات بنكون كمرناها وطبخناها 

بعدين بنضيفها ع الخضار 

وسلامتكم

كبة من غير هبرة ( ميسون )

كبة بندورة ( ميسون )

الكبة بندورة 

برغل اسمر مغسول مو منقوع وبصلة وبندورة وفليفلة خضرا وكمون ودبس فليفلة حدة نار بتطحنيهن ع مكنة الكبة مفرمة اللحم دور او دورين كيف مابدك ودغري بتعركيها لتصير تشبه الكبة النية وبتقدميها بصحن وبقدونس وزيت زيتون ع الوجه وصحتين وهنا

دجاج مشوي بصلصة الفطر والماش بتيتو ( نور )

الماش بوتيتوز اخدت الطريقه من منال العالم

وكتير طيبه وزابطة

حسب الكمية يلي بدك ياها بتجيبي بطاطا وبتقشريها وبتقطعيها مكعبات كليرة شرية وبتسلقيها بمي نغليه لحتى تستوي تماما

بتصفيها بالمصفايه وبتحطيها بزبديه

وبتهرسيها بهراسة البطاطا

بتضيفيلها زبدة الكميه حسب الرغبه وحليب وبتمزجيهم

وبعدين كمان حليب لحتى توصل للسماكة يلي بدك ياهاوملح وفلفل ابيض شوي

وبعدين بتحركيهم منيح لحتى يتجانسوا وبيصير لون البطاطا فاتح ابيض وناعمه

 بالنسبه للدجاج بتجيبي صدور وبتشرحيهم وبدقيهم ليصيروا رقاق

وحطيت بهارات عليهم

ملح

فلفل

بابريكا

كركم

بهارات دجاج

وجبت مقلايه كبيره حطيت شوية زبده

وقليتهم عالوجهين ليستوا

مابياخدوا وقت لانهم مشروحين ورقاق

بتحطيهم ببايركسة

بالنسبه لصوص الفطر

قليت علبة الفطربنفس المقلايه يلي شويت فيها الجاج

وبعدين عملت صلصة بشاميل عاديه وضفت عليها الفطر وكمشة جبنة موزريلا وشرية كريمة طبخ ونص ظرف شوربة فطر ومكعب ماجي وزشة ملح ورشة بهارات ايطالية

وخليتهم ليتجانسوا

صبيتهم فوق الدجاج

وبيتقدموا

والماش بوتيتوز جنبهم

وصحتين وهنا

بالنسبه للبطاطا لحتى تعطي افضل نتيجه تهرسيها وهي سخنه وبدوب فيها الزبده

بابا غنوج ( سلام ، سناء )

 اشوي الباذنجان.. وقشريه وهو سخن اسهل عليكي.. اهريسيهم بالشوكة وهو سخن كمان اسهل او حطيهم بالبراون محضرة الطعام بس اصوله ما يكون مطحون وناعم.. بعد هرسه حطي عصير ليمون وتوم ناعم. ودبس رمان وملعقة واحدة طحينة. وملح واخلطيهم مع بعض.. حطيهم بصحن التقديم وزبنيهم بحب الرمان الحامض. وزيت زيتون ونعنعة او بقدونس حسب الرغبة.. وصحتين وهنا..

طريقة 

 هي بابا عنوج بيتنجان مشوي وبصل وبندورة وبقدونس ناعم ودبس رمان وجوز

طريقة 

 بابا غنوج باذنجان مشوي وبصل وثوم وبقدونس وتمر هندي وللزينة  زيت ورمان وجوز وصحة وعافية