السلمون بالبروكلي ( بتول )

 السلمون:

بتبليه بهارات السمك رشة ملح وكزبرة يابسة وبابريكا وتوم بودره ..حطي شوية زيت زيتون وقليهم على الوجهين ،عصري ليمونتين ونزليهم فوقهم

الخضار :سلقي البروكلي نص سلقة ولا تكبي الموي تبعهم مناخدهم للصوص

وبشوية زيت مازولا قلي شي٥فصوص توم مع جزر وفطر فريش وحطيلهم رشة من بهارات السمك خليهم يشبعو تقلاية لحتى يبلشو يستو

الصوص :زبدة مع ٣معالق طحين والموي تبع البروكلي وحركيهم منيح وبتنزلي ظرف شوربة الفطر من ماجي مع رشة توم بودرة  وركزي ملحها ورشة زنجبيل وخردل 

بعدين حطي الخضار كلها بالصوص ونزليهم على السمك وغلفيهم بقصدير وخليهم ليغلو على النار شي ربع ساعة 

وصحتين والف هنا 🌺🌺

دجاج على الطريقة التركية ( ميساء )

 دجاج بالفرن بالكيس

كوب عصير تفاح 

ملعقة عسل 

ليمون 

ملح 

وبهار المردكوش 

فليفلة حلوة حمرة 

تبلون وبنقع الجاجة شي 3ساعات 

وبطاطا بنقعها بنفس التتبيلة بس بطشت لحالها 

بعدين بكب تتبيلة الجاج وبكتفي بتبع البطاطا وبحط البطاطا وجاج بكيس واحد 

وبالفرن شي ساعة ونص او ساعتين 

وكلي ودعيلي 

دجاج ع طريقة تركية

السليق السعودي يوتيوب ( ميسون )

أنا زيادة بحط لبن زبادي معه 

مكمور الكوسا ( محشي الكوسا بطريقة جديدة ) باللبناني ( أبلما ) ( طوبى )

 بتحفري الكوسا نصف حفر يعني متل تبع الشيخ المحشي بعدين بتبلي الحشوة ويلي هيي عبارة عن لحمة مفرومة مقلية مع بصلة ناعمة ورز وبقدونس وملح وفلفل بتحشي الكوسا بعدين بتقليهن بالزيت وبتصفيهن وبتعملي النصبة يلي هيي عبارة عن مي ورب البندورة وبصل ريش بس يغلو بتسقطي الكوسا وبتغليهن مابدهن كتير وقت باعتبار الكوسا مقلية واللحمة مسوية يعني عبين مايستوي الرز بعدين بتشيليهن من الطنجرة وبتسكبي وعالوش زينيهن برشة بقدونس وصحتين وهنا

وممكن أن تكون اللحمة مو مقلية بس التبلة كلها بتتقلا عالغاز متل اليالنجي نص استوا لأن الكوسا مستوي بكون

بادلب هاد الشيخ المحشي الكوسا😌وبعض الناس مابتحط دبس بندورة بس مي وملح وبهار وجنبو لبن متوم

عجينة أم ميسم

3كوب طحين

كوب ماء دافي

ربع كوب زيت

ربع كوب حليب بودرة

علبة زبادي

ملعقتين سكر

رشة ملح

ملعقتين بكنج بودر

يمكن اضافة مربع بف باتيسري لكل كاسة دقيق 

ملاحظة يمكن رش قليل من  السميد في قاع صينية البيتزا حتى تصبح مقرمشة 

كوردون بلو مستحدث ( أمل )

طريقة "كوردون بلو":

اقلي شرائح دجاج جاهزة(زنجر او فيليه) و صفيها بجاط بيركس

اقلي بطاطا اصابع و ضعيها مع الجاج

عالنار قلي علبة فطر بالزبدة مع شوية ملح و فلفل و بودرة ثوم(او سن ثوم) و ممكن مكعب ماجي لو حبيتي

بعدها ضيفي ظرف شوربة فطر مع عيارها من المي حسب المكتوب عالظرف و اتركيهم حتى يغلو

اطفي النار و ضيفي كوب كريمة طبخ

صبي الصلصة فوق الجاج

ابشري جبنة عالوش

دخليها الفرن ربع ساعة تقريبا حتى تتسبك مع بعض و تذوب الجبنة

و الف صحة و هنا🌷

برك مشوية ( ريم )

عجينة برك مشوي  ..

2 1/2 كوب طحين 

1/2 ك حليب دافئ 

1/2 ك لبن دافئ 

1/4 ك زيت نباتي

1 م ك.  خميرة

1 م ك. سكر

ملح حسب الرغبة 

تخلط المكونات وتعجن وترتاح ساعة ثم نشتغل بها ..

القلب لحمة 

والدوائر جبنة 

وصحة وهنا 

خميرة بيتية (غيداء )

يلي ما عنده خميرة

يمكن ان يعمل عجينة ماء ودقيق .....يلفها بكيس ويتركها اكثر من ٢٤ساعة خارج الثلاجة .....فتتخمر ....ويصبح لها رائحة عجين متخمر وايضا يصبح لونها اسمر 

يمكنك اخذ قطعة من هذه العجينة وتضعيها فوق مقادير العجين وتتركيها لمدة ساعة ....فيتخمر العجين ويصبح مناسب للخبز 

هذه الخميرة عادة تستخدم في الافران وفي اوروبا نشتريها من المخبز او اماكن الخبز في السوبر ماركت وتسمى بعض الاحيان بالخميرة البيتية 

ويمكن ان تحتفظي بها في الثلاجة عدة ايام او اسبوعين واكثر 

وصحة وهنا

روستو ( أحلام )

قطعة روستو بتوصي عليها وتربطيها بخيط وبعدين بغزا بالسكين وبحط توم فيها وبحط تشكيلة ملح فلقل وبهارات مشكلة وع قرفة وزنجبيل وقرنفل بملحها ويحطها بطنجرة بقليها منيح من كل الجوانب بزيت مع سمنة لتحمر منيح وبغمرها بالمي بطنجرة الضغط طبعاً ساعة بعدين بطالعها وبتركها تبرد قبل مانشيل الخيط وقطعها لأن بتفرط إذا سخنة ومابيطلع شكلها مدور بعمل الصوص يلي هوة عبارة عن زبدة وطحين ومرقة اللحمة نفسها وماجي وبعمل بطاطا بيوريه وخضار مسلوقة على حسي الرغبة

رز كابلي ( الغيدائي )

رز كابلي 

بعمله برز امريكي (ابو بنت )...بنقعه

بفرم بصلتين وسط ..اقرب للناعم (على المفرمة)....بحط شوي زيت وشوي سمنة ...وبقلي البصل منيح منيح ....بضيف ملعقتين صلصة طماطم ...وبحمصهم مع البصل ...وبعدها بضيف بهارات الرز الكابلي ...ورشة هيل وملح ...وبحمصهم كمان ...والريحة الحلوة بتطلع ...

بضيف الماء ....الى ان يغلي بضيف الرز ...وبقلبه بعد ١٠د...وبتركه يتهدا شي ربع ساعة

الدجاج على الطريقة الغيدائية :

٣ملاعق كتشب ٣ملاعق مايونيز٢ ملعقة لبن ١ملعقة صلصة طماطم ملعقة خل ملح فلفل بهار مشكل بهار الدجاج رشة اورغانورصغيرة هيل كزبره يابسة رشة ...قليل من زيت الذرة وقلبيهم منيح منيح 

قطعي صدور الدجاج المخلية وتبليهم بالمزيج السابق ...وبالفرن لمدة ساعة ونصف تقريبا (الى ان ينضج)

الف صحة وهنا

دجاج بالفخار ( بشرى + غيداء )

دجاج بالفخارة طريقة اخرى 

طاجن الدجاج التركي 

بصل قطعة حسب الرغبة 

٣فص ثوم 

طماطم 

زيت زيتون 

صدور دجاج مقطعة طويلة مطبوخة مع قليل من الزيت وملح وفلفل حتى تنضج وتجف 

على النار قليل من زيت الزيتون  والبصل والثوم حتى ينضج ....نضيف ملح وفلفل وزنجبيل ناعم جاف 

نضيف الطماطم مقطعة جناحات .....وتوضع على نار مرتفعة نسبيا 

بالفخارة ....ترص قطع الدجاج وعليها الصلصة بقطعها الكبيرة وتدخل الفرن ....لمدة نصف ساعة .....وترش بالجبنة الموزريلا وتقدم ساخنة

ممكن إضافة فطر مقطع 

دجاج بالفخار ( غفران )

دجاج بالفخار  

بتقطعي صدورة جاج مكعبات وبتنقعيهم شي نص ساعة بالخل وبعدها بتغسليهم وبتبليهم ملح وفلفل وبهارات دجاج وهيل مطحون وزنجبيل وتوم بودرة وبصل بودرة بتقليهم بزيت مازولا وبتكوني مقطعة بصلة ناعمةجزر مطاول ومكعبات بطاطاالجزر فوري عليه بشان يستوي وقليهم مع الجاج بس البطاطا قليها متل البطاطا المقلية وخليها لآخر شي لأنو بتكون مستوية وحطي فطر ودرة  بتكوني طابخة بشاميل وحطي  بقلبها معلقتين جبنة دهن وعلبة كريما صغيرة وحطيهم فوق الجاج وحطي على وشها قشقوان وزهري وشها بالفرن وصحة وهنا

وفلفلي رز أبيض كبسة مع درة

خاروف محشي يبرق ( ورق عنب )

 بيغلو اليبرق مع حمض منيح ربع ساعة بدون مايكترو ماء وبشيلوه بس يبرد بصفوه جوا الخاروف وبسكرو منيح طبقتين تلاتة قصدير وبحطو بصينية الشوي مي كل مانشفت بزيدوها مابكون كبير الخاروف بالكتير سبعة /تمانة كيلو كل كيلو ساعة وبس يستوي بيطلع متل هالمنظر بس اليبرق  مابكون اخضر لهالدرجة اغمق من هيك..

ممكن يعملو كتف محشي ورق عنب أيضا 

وصحة وهنا 

مسخن بالدجاج ( طيبة )

بتقلي بصل ريش بزيت زيتون وبعدين بتنزلي الدجاج وملح وفلفل ليستو بتحطي السماق وكتري

واي نوع خبز بتحبي بالمرقوق او الكندي

وعالسخانة بس الزيت لازم يكون كتير 🍗🍗🍗

ممكن بالتورتيلا 

أو الفطير  المشلتت

أو السبرنج رول 

أو عجينة الكلاج 

أو أقماع العجينة 

أوالبف باتسيري

معكرونه بالخضار مع البشاميل ( طيبة )

معكرونة بالخضار مع البشاميل 

نسلق المعكرونة 

ثم بتقلي بالزبدة بصلة ناعمة وبندورة وفليفلة وفلفل وملح ومكعب ماجي وشوية كاري وثوم بودرة وبعدين فطر ودرة وكتشب وشوية خردل 

بتعملي البشاميل وبتحركيون مع بعض وبتخلي البشاميل طري وكتيروعالجاط   وعالوجه قشقوان ورشة باربكيو وصحة والف هنا 👍

فطيرة الدجاج ( سمية )

فطيرة  الدجاج 

دجاج مسلوق

قسمته بالسكين وحطيته عالنار مع شوية زيت ورشة ملح ورشة بهارات وقلبتهم لتحمروا بعدين حطيت ذرة وطفيت النار

بزبدية حطيت ملعقة مايونيز وملعقتين جبنة سائلة وملعقتين قشطة  وحركتهم وحطيت عليهن الدجاج وحطيت فليفلة مربعات

وضعته على سطح عجينة وشويتها بالفرن ..

وصحة وهنا 

فلافل ( بشرى )

الفلافل . مننقع الحمص وبعدين منفرمو على ماكينه الكبه و منفرم معو بصل و توم حسب كميه الحمص و كم عرق بقدونس تخضر و كزبرة خضرة و بعدين منتبلهابملح وفلفل اسود  -و بهارات الفلافل لوعندك لو ماعندك البهارات التانيه كافيه -بهارات مشكله و كزبرة ملعقتين تلاته  -و كمون كمان ملعقتين تلاته-  فلفل احمر و انا بحطلا  كمان شويه كاري كلو سوى( لو بدك تستخدمياا فورا حطي البصل وللتوم ) اما لو كميه كبيرة وناوي تفرزيها بس لتستخدمياضيفيلا البصل والتوم منشان تضل ريحتاحلوة وتازة - و ضيفيلا شوي مي مع ملعقه صغيرة كربوله  و حطي ع النار زيت غزير  وباستخدام ملعقه الفلافل و قالبو اول مابحمه بلش  شكلي الفلافل بالقالب و حطي ع وشو سمسم وقليه بعدين   بالزيت ونوصب الزيت منشان ياخد وقتو بالاستواء ومايغمق بسرعه  و حضريلا السرفيس  تبعها والسماق و صحه وهنا

كرات الدجاج الإيطالية ( سمية )

برغر اللحم البيتي ( أمول )

الطريقة لمن طلبها:

كيلو لحمة ناعمة

بصلة صغيرة مفرومة ناعم

سنين ثوم

ربع كوب كعك مدقوق

بيضة

٢م.ص ملح

نص م.ص فلفل

م.ص بهار مشكل

نص كوب جبنة مبشورة (خليط شدر و موزاريلا)

يعجن مع بعض و يشكل على شكل اقراص
وأضعها بالفريزر مع طبقات نايلون بين كل حبتين لحين الاستعمال

و الف صحة🌷🌷

طريقة اختي اسوم الله يسلم ايديها💕💕

هي بتضيف للخلطة كمان ٢م.ك كتشب

شريحتين توست من غير الاطراف مرطبين بشوية حليب

يقطين باللبن ( أمل )

يقطين باللبن 

بتقطعيه مكعبات و بتقليه

بتطبخي لبن مثل الشاكرية و بتحطي اليقطين

قلي لحمة ناعمة و بصلة..نصهم جوا اللبن و الباقي عالوش

لبن الشاكرية 

لبن رايب ( جالون لتر ) 

حوالي 3 ملاعق طعام غير مملوءة نشا 

قليل من الماء 

بيضة 

إذابة النشا مع البيضة بالماء ... تصب فوق اللبن مع الملح ...ترفع على النار مع التحريل المستمر إلى أن تغلي 

يضاف لها مكعبات اليقطين واللحمة المقلية 

مع رز أبيض 

بامية بالفرن ( أمل )

 الطريقة:

قلي بصلة مفرومة ناعم بالقليل من زيت الزيتون

اضيفي ربع كيلو لحمة شقف(صغيرة) و قلبي

اضيفي ثلاثة ارباع م.ص ملح و نصف م.ص فلفل اسود

اطفي النار و اضيفي:

نص كيلو بامية

٣حبات بندورة مكعبات

راس ثوم كامل مقشر دون هرس

مكعب ماجي

م.ص قرفة

م.ك معجون طماطم

نضيف الماء يا دوب ينغمرو (مو يسبحو)

نضعهم في بايركس

عالفرن الرف المباشر فوق النار

حرارة ٢٠٠

حتى يجف غالب الماء و يبقى القليل من الصلصة

تقريبا ساعة و ربع

هذا عيار صغير👆🏼

بيحسن الواحد يضاعفه قد ما بده

سلطة الخرشوف ( ريم )

 سلطة الخرشوف ..

طبقة جرجير مقطع

طبقة أنكينار مقطع 

بصل أخضر مقطع 

رمان عالوجه 

..

بزبدية جانبية بخلط سن ثوم مع عصير ليمون وزيت زيتون وملح وبصبهم فوقها قبل التقديم وصحة وهنا 😊

 لو عندي فطر فريش كمان بقطع شرائح وبضيفهم

دجاج ايطالي بالكريمة ( ريم )

 دجاج إيطالي بالكريمة

يفضل تحضير صدور الدجاج قبل كم ساعة إن أمكن.. 

- غزي الصدور بالشوكة وتبليهم بفلفل وبابريكا وملح وبهارات الدجاج وليمون وافركيهم بثوم مهروس 

- نضع القليل من الزيت في المقلاة ويطبخ الدجاج على نار هادئة على كل جنب حوالي ال7 دقائق مع وضع غطاء المقلاة 

- لتجهيز الصوص نستخدم نفس مقلاة الدجاج..  نضع زبدة وبصل مقطع شرائح وفص ثوم مهروس وفطر شرائح ونقلب حوالي ال5 دقائق ونضيف الملح والفلفل والريحان المجفف ورشة أوريجانو 

- ثم نضيف كريمة سائلة ونعيد الدجاج المطهو سابقا ونتركهم قليلا ليتسبكوا ..

يقدم معها بطاطا بيوريه أو رز أو مكرونة                        

طريقتي البطاطا.. 

تقشر البطاطا وتقطع مكعبات كبيرة وتسلق بالحليب ، وبعد النضوج تضاف الزبدة وملح وفلفل ورشة صغيرة سكر وتهرس

لازانيا ( أم عبد الله )

طريقة عمل اللازانيا 

نسلق معكرونه 

نحمص اللحمه مع الفلفل الاخضر والفطر 

ونضع معها معلقه صلصه بندوره 

ونحضر خلطه بشاميل (نص كوب حليب بودره نص كوب طحين بيضه معلقه قشطه وزبده)

نبدأ برص طبقه معكرونه ثم اللحم ثم بشاميل وجبنه موزاريلا..ونكرر الطبقات حتى تمتلأ الصينينه 

الطبقه الخيره تكون بشاميل وجبنه موزاريلا 

ثم نحمرها بالفرن من الاعلى والاسفل وصحه وعافيه

دجاج مع الخضار بالنكهة الإيطالية

صينية فروج مع الخضار بالنكهة الايطالية طبعا الصورة قبل الخبز .. المكونات فروج وبطاطا وجزر ودرة وزيت زيتون وبهارات ايطالية ( ريحان واكليل الجبل وزعتر  بري ) وفلفل اسود وتوم بودرة وملح .  كلن سوا عالفرن ليستووا وبتطلع كتير طيبة وسريعة

ستربس الدجاج الغيدائي

استربس الدجاج

اول الشي حضري حالك للعمل

هي شغله مهمه

لانه اذا مو جايه على بالك ...ما بتطلع طيبه

في شغله اذا ما عندك ...مافي داعي تفكري تعمليها ...من عين اصله...وهي ماء مخلل

تانيا:بدو يكون عندك صدور دجاج مخلي (افضل)

ثالثا:تشرحي الصدور على الطول يعني متل الاصابع

هذا حتى تنقعي فيه الدجاج 

مع قليل من الخل 

ملح 

فلفل

ثوم مجفف

بهار حلو

هيل

 بتغمريهم وبتنقعيهم

ساعة او اكثر 

بعدين 

بيض عليه ملح وفلفل

دقيق عليه ملح وفلفل وبهار وهيل ناعم ...وملعقتين طعام نشا 

طيب هلاء

زيت يغمرهم 

حامي

بتاخدي القطعة بالدقيق ثم البيض ثم الدقيق مرة اخرى

ومباشرة على زيت حامي 

وبتخلي النار بعد ما يحمى ثلاث ارباع قوتها 

وبتقليهم لينضجو ويتحمرو 

اوه شو طيبة

😋😋😋😋

الف صحة

سلطة مكسيكية بخبز التورتيلا (بشرى )

سلطة مكسيكسة بقوارب التورتيلا:  واحد فليفلة  كبيرة حمرة - واحد فليفلةكبيرة صفرة و 2فليفلة خضرة - قرن فليفلة حدة - 2خس متوسط الحجم - علبة فاصوليي حمراء- كوب ونص درة- 4-5بندورات كبار - 2 افوكادة يقطع ويغصر عليه  لبمون منشان مايسود- جميع المكونات السابقة  تقطع بحجم متوسط متناسق#  الصوص: فنجان صغير عصير ليمون - ملعقتين او تلاثة خل التفاح - ربع كوب زيت ز يتون - خردل و ملعقتبن كمون وملح وفلفل  طبعا ندوق و توازن النكهات و تجمع المكونات السابقة و نضيف عليها التغميسة# اما فكرة القوارب يقطعها دوائر تناسب صينية الكب كيك كل قطعة خبز نضعها في  ال حفرة المخصصة للكب كيك نضعها في الفرن حتى تشقر لونها وتصبح مقرمشوة

سمبوسة بعجينة البف باتيسري ( أماني )

                        طريقة العجينه سهله .. 

نذوب شريحتين بف باستري في الميكرويف ثم نعجنها مع كوب دقيق ونصف كوب ماء دافيء ورشة ملح ،، نعجنهم باليد ثم نغطيها ترتاح ساعه ونشكلها ونحشيها بأي حشوه ،، انا حشيتها بجبن كرفت مبشوره ✨ممكن تونه او دجاج او جبن ابيض 

كرات اللحم السويدية مع ماش بتيتو

والماش بوتيتو .. بسلق بطاطا مكعبات حتى تستوي بصفيها وبهرسها وهية سخنة مع زبدة وشوية حليب وملح وبهار وصحة وعافية

معكرونة بالبشاميل والدجاج ( طوبى )

معكرونة بالبشاميل 

بتسلقي المعكرونة وبتقلي بالزبدة دجاج مع فطر وبتحطي المعكرونة بالبيركس بتضيفي الفطر والدجاج وبتضيفي البشاميل وخليهن كتار مشان تبقى رهفة ( طرية ) 😊وعالوش قشقوان وببحمر بالفرن وصحتين وهنا

عجينة البرك ( طوبى )

البرك عجينتها كتير طيبة ولذيذة وسهلة

بتحطي كيلو طحين بضيفي نصف كاسة زيت بلدي والنص التاني مازولا وبتعجنيهن مع بعض منيح بتحطي كاسة مي فاترة بتدويي فيها ملعقة خميرة صغيرة وبتضيفيها للطحين مع ملعقة صغيرة ملح والتانية سكر بتعجنيهن مزبوط وبتتركيها ترتاح شي نصف ساعة بعدين بتعملي البرك 

انا عملت جبنة وسبانخ ودجاج وبيتزا

فريكة مع الكريمة والفطر ( طيبة )

الطريقة 

منقلي بصلة وفطر فريش مع فلفل وملح ومكعبين ماجي  بكمية من الزبدة والزيت المازولا ومنقلي الفريكة ومنغمرها بالماء لتنشف المي منحطها على نار خفيفة ومنتركها تتهدى وبالأخير قشقوان وكريمة طبخ 

وعلى وجها صدورة الدجاج وقشقوان وصنوبر 

وصحة وألف هنا 

طريقة حفظ الجبنة ( غفران )

 الجبنة بملحها منيح منيح وبغليها بمي وملح وبصفيها وبعبيها بكياس وبحطها بالفريزة وقت بدي استعلها بطالع كيس وليدوب بغلي مي ورشة ملح وبحط بمطربان وبحطو بالبراد

حفظ الجبنة والأعشاب ( سلام )

عادة الاعشاب تحفظ بزيت الزيتون والجبنة بدها تتنشف منيح مشان تنحط بالزيت ومتلها منعمل بزعتر اخضر مع شرحات ليمون بس هي كلها حفظ بالبراد وبس طولتي عليها بيختلف قوامها الجبنة بتقسى يعني كل هي يفضل تاريخ صلاحية مو طويل

شيش برك ( نور )

حطيت على وجهه شوية كزبرة مقلايه                        

 انا قليت بشوية سمنة توم مهروس مع كزبرة وبعدين ضفت اللحمه الناعمه وملح وفلفل                        

 والعجينة كاستين طحين وكاسة مي وشوية ملح                        

 واللبن متل الشاكرية

لبن ونشا وبيضة                        

 وقطعت العجينة دوائر بفنجان القهوة

دجاج باربكيو ( هدى )

هي الصوصات  بس بحط منهم على الدجاج وبقطع بصل وشويه زيت وماء وشويه بهارت  وبخلطهم وبنحطهم بلفرن ساعه او اكتر مغطاين بقصدير

وبطاطا حسب الرغبة

بطاطا مكسيكية ( أمل )

🍟 البطاطا المكسيكية 🍟

نقلي بطاطا ودجز

في طنجرة عالنار نضع قليل زيت مع 4 اسنان ثوم مهروس و نقلب

نضيف ربع كيلو لحمة ناعمة وملح و فلفل و نقلب حتى تستوي

👈🏼 بعدين اضفت الصلصة المكسيكية تبع انشيلادا الدجاج(كنت قايمة علبة صغيرة صلصة بالثلاجة) ..أعطت الطعم المزبوط

👈🏼 لو ما عندك الصلصة ممكن تستبدليها بحبة فليفلة و حبة بندورة مفرومين ناعم مع ملعقة كبيرة معجون طماطم

و تتركي الصلصة مع اللحمة على نار هادية تتعقد

ضيفي نصف البطاطا و قلبيهم مع الصلصة

بالجاط ضعي طبقة  البطاطا المقلية

ثم البطاطا مع الصلصة

ثم كمية وافية من جبنة الشدر المبشورة

ممكن تحطيها بالفرن حتى تذوب الجبنة

أو بالميكرويف

و ألف صحة و هنا

برجر اللحم ( بشرى )

برغر اللحم  

. نضيف للحم (كيلو العيار) ملعقتين بودرة التوم -كاسة بسمات-بيضة - ملعقة بهارات مكسيكي - ملعقة كمون -ملعقة كزبرةناشفة- ملعقة فلفل اسود- ملح - ملعقة بودرة البصل - ملعقتين بهار ات مشكلة- انا ضفت  نوع من البهار اسمو بهار السجق لو حصلتوه بيعطي نكهة طيبة كتير و منضيف قطعة دهنى هيرسر البرغر الطيب تعجن  المكونات سوى وبحطابراد لتاني يوم فيكي تقليها او تشوبها ولاتخافي مابتنشف لانو فيها الدهنى منجيب خبر السمون مندعن  بالكتشي ثم شريحةخس ثم الهمبرغر ثم شريحة جبنةموزوريلا ثم بطاطا لو حابة -  شرائح بندورة - شرائح بصل ثم بمنضعطا سوى وصحة وهنا .  يمكن فرم الخس مع البصل الأخضر ومنخليا اول طبقة بدي  الخسة الكاملة .  نفس الطريقة برغر الدجاج  بدون بهار السجق

دجاج ببطاطا بلمسة جديدة

فخاد مغسولة ومنضفة .  بطاطا مقطعة حلقات وبندورة وحدة كمان حلقات و فليفلة حدة وحدة كمان حلقات منحط كل شي باابايركس ومنبهر بالفلفل الاسود والقرفة والملح و منعصر برتقالة كاملة ومنحط عصيرها و فنجان قهوة زيت نباتي ومعلقة سمنة وفنجان قهوة مي .. غطوها بالقصدير وعالفرن لتستوي وبعدين حمروها .. عوافي يارب .. جربوها مابتندموا 

كبة بدون ماكينة .....

كل كاسة برغل ناعم بدا كاسة ونص مي مغليه .. بتحطو المي فوق البرغل وبتغطوه شغلة ساعة ليشرب المي منيح .. بعدين بتبرشوا بصل ناعم وبتحطوه فوق البرغل و بتحطوا معلقة ملح و بهار وبتخلطوا منيح وبتحطوا بالبراد شغلة ساعة .. بعدين بتحطوا كاسة طحين عالبرغل ونص كاسة زيت وبتدعكوا منيح منيح لتصير عجينة الكبة متماسكة وتتشكل معكن .. ملاحظة صغيرة يمكن ماتحتاجو كل كمية الزيت .. يعني حطوا ربع كاسة بالاول وزيدوا بعدين على حسب الحاجة .. واحشوها متل مابتحبوا ....

وصحة وهنا 

البرياني ( ميساء )

                   دجاج قطع متوسطه              

                          بصل وثوم مجفف                        

                       صلصة طماطم                        

                       زيت مازولا                        

   لبن زبادي او ع جالون

ملح وفلفل 

بهارات البرياني 

ماء الكادي 

رز حبة طويلة منقوع لمدة ساعة 

في قدر قطع الدجاج نغليها وننزع الماء والزفرة ونكبها ثم

في قدر قطع الدجاج مع البصل والثوم والصلصة وزيت مازولا ولبن وبهارات البرياني نغلق القدر .... ونتركها لتنضج

نطبخ الرز عادي .... بعد أن ينضج نضيف قليل من ماء الكادي ، وصفار الزعفران بعد إذابته بقليل من الماء ... ويوضع في نقطتين في القدر دون التحريك لبعد ما ينضج .

الحمص بالطحينة ( مسبحة شامية ) الغيدائية

 بكل بساطة ...

حمص منقوع قبل ليلة.. الحمص فوق غمره ماء ....وبالطنجرة مع ماء حتى يغلي ويطلع رغوة بيضاء ....ازيلي هذه الرغوة ....ضيفي ملعقة صغيرة من البكربونات ...تفور الرغوة وتطلع اكثر ...ازيليها ...ثم اسلقها بطنجرة الضغط ...ربع الى ثلث ساعة بعد ما تصفر بخفض النار 

بعد ما يصير دافي الحمص .....بابريق الخلاط ...

حمص بقدر كاستين ...٢ملعقة ليمون ملح...طحينة حوالي ٤ملاعق طعام ...قليل من ماء الحمص ونطحنه جيدا ....لحتى يصبح متجانس تمام ...اذا سميك نضيف ماء حمص او ماء عادي 

ممكن تضيف ملعقة لبن بدل الماء....كمان بيصير  براحتك 

بعدين بتمديهم بالصحن ....والسمن البلدي بتحمي منيح لتطلع ريحته ....بتدلقي الصنوبر ثواني ....وبتطشيها على المسبحة ....وبتطرش وبتعبق الريحة ....وكلي الف صحة وهنا 

الله على الروايح                        

 طبعا هي مسبحة ....بس بتقدرو تعملو منها فتة حمص (تسقية)                        

 طبعا قضية الحمض والملح اذواق ....لك ان تضيفي ملح ليمون ...براحتك 

ولكن بعد التجربة ...لتصلي الى المذاق اللذيذ ...وطعم المسبحة الاصلي ....انصحك لا تكتري ليمون ....والطحينة تكون زايدة شوي ....هنا يكمن المذاق

الكريمة الحامضة ( أمل )

هي كريمة طبخ عادية

الكريمة الحامضة او sour cream

من انواع الكريمة..قوامها متل اللبن و طعمتها فيها لدعة شوي

بالوصفة مكتوب اذا ما توفرت

اخلطي علبة لبن صغيرة مع علبة قيمر صغيرة و ملعقة صغيرة ليمون

عش البلبل عدة طرق

عجينة أخرى 

طريقة عش البلبل: كيلو طحين بيضة فنجان قهوة سمنة فنجان قهوة وين نباتي رشة ملح فنجان قطر تقريباكاسة ونص ماء  وبعد العجن لو حسيتيهاناشفة زيديلا مي بدها ترتاح تقريب الساعتين

عجينة أخرى 

كيلو طحين معلقة ملح معلقتين حليب معلقتين سمنة

الحشوة لحمة وبصلة وطحينة ودبس رمان وعصيرليمون ملح وفلفل وبهار وصنوبر وقليل من اللبن رشة كزبرة يابسة 

ممكن أن نعملها بالجبنة أيضا 

بيتزا ( بشرى )

عيار الييتزا العجينة السريعة اول شي 2كاسة طحين مع ملعقتين خميرة مع ملعقة بيكمبودر و 3ملاعق سكر و كاسة ماء دافئ تعجن وتخمر ربع ساعة  ثم نضيف 3كاسات طخين و نص كاسة زيت و 3ملاعق حليب بودرة و ملعقة ملح و كاسة ماء وتعجن يمكن تحتاج اكتر ماء حسب نوع الطحين ممكن استخدامها فورا او تتركيا تتخمر *

الخلطة على وجه البيتزا حسب الرغبة 

سمبوسك مقلية

 والحشوة على زوقك                        
 جبنة او لحمة او خضار                        
 قلي عادي بزيت غزير لحتى تحمر وتنتفخ .. متل السنبوسك                        

مليحي درعا ( سلوى )

                        المليحي 

اول شي جهزت البرغل الخشن نقيته وغسلته  بعدين ملعقتين سمنة قلبت البرغل فيهن عنار هادية ورشة فلفل وملح  بعدين ضفت مي سخنة لكل كاسة برغل تقريباً كاستين ونص مي وسكرت عليهن طنجرة الضغط عنار هادية لازم يدووووب البرغل طريقة طبخ اللبن بالخلاط لبن مع ملعقتين نشا وبيضة خفقتن شري بعدين عالنار مع التحريك حتى سخن اللبن ضفت من ماء الجاج المسلوق مع التحريك حتى الغليان خففت النار عالآخر وحطيت ملح وملح ليمون حسب الذوق لانه لبن السعودية حلوو وهي الاكلة لازمها حموضة باللبن وبصراحة حطيت مكعب ماجي بحب نكهته باللبن المطبوخ وبعدين حطيت الدجاج المسلوق باللبن وخليته يغلي شوي وبس ينضج البرغل ببلش ادعكه مع اضافة اللبن المطبوخ واللي بيحب بيضيف سمنة انا ماضفت هيييك لتندعك الكمية المطلوبة وبيتوزع الدجاج عالوجه وبالاصل لازم كبة مقلية عوجه المنسف وبتتشرب من اللبن الموجود فيه وصحتيييين وعافية

كودو ( بشرى )

كودو الدجاج .  العيارات  لنص كيلو صدرو دجاج يقطع بشكل طولي قطع رفيعة و ينفع بالخل والملح الصخري يصفة  بعدين نتبله ل2ملعقة كبيرة كتشب 2ملعقة كبيرة خردل 2ماعقة كبيرة صويا صوص 2ملعقة مايونيز انا استبدلهاباللبن 1ملعقة صغيرة هيل 1ملعقة صغيرة كزبرة ناعمة-  1ملعقة صغيرة بهارات دجاج او مشكلة لموجود عندك- نص ملعقة كمون  ملعقة بودرة التوم وملح وفلفل اسود-و قطعي 3بصلات بشكل جوانح و نقعين بالتتبيلة ليلة كاملة  ثم ضعي في طنجرة 3ملاعق كبار زيت نباتي و ضيفي الدجاج وقلبي لتستوي - فيكي تضيفي فليفة ملونة مقطعة جوانح بعدين بخبز التورتبلا -للسندويش خس مقطع ناعم بندورة شرائح رفيعة -  مخلل خيار مقطع شرائح طولية رفيعة التغميسة عراحتك انا بضيف لبن مع خردل و صلصة حدة.

كبة التوست ( سلوى )

المقادير كاسة برغل ناعم وكيس خبز توست وملعقتين طحين رشة ملح رشة فلفل ورشة بهارات مشكلة رشة كمون رشة كزبرة يابسة وشي كاسة ونص مي  الطريقة بنغسل البرغل وبنتركه عجنب بعدين بنطحن خبز التوست انا طحنته بمطحنة القهوة وبيصير بالخلاط وبعدين البرغل طحنته نفس الشي بعدين بنخلطهن وبنضيف البهارات وبنعجنها بالمي بنغطيها وبنحضر الحشوة لحمة وبصل وبهارات وملح وشرية دبس رمان ورشة فليفلة حمرا ومكسرات اللي بيحب  وهيك جاهزة للتشكيل انا حطيت نقطة زيت عإيدي حتى ما تلزق وعالقلي وصحتين وعافية

التوست طازج .. وممكن أن يكون أبيض أو أسمر ... والابيض أطيب ...غير قابله للتخزين على القلي مباشرة 

طاجن اللحم المغربي ( دانية )

 طاجن اللحم المغربي 

....بصلتين متوسطه..٥حبات طماطم كبيره.....٣فص ثوم...رشة كزبرا خضراء... وفليفلة خضراء كمان مقطعه بشكل طولي... نقطعهم بشكل طولي والكزبة فرم عادي 

بقدر الضغط....بعد ان نغسل اللحم جيدا...ونغسله بعد الزفره ...نضع اللحم (لحم بالعظم )فوقه الخضار المعدة...مع ربع كاس صغير زيت ...مع ملح وفلفل اسود ...ونغلق القدر ...بعد الصفارة نصف ساعة...تقريباً

والأرز 

أرز بسمتي أبيض ساده بدوه أي اضافات

الف صحة وهنا🌷                        

بطاطا كمبير

بطاطا كمبير  : بشوي البطاطا بقشرها بعد ما اغسلها منيح اما بالفرن او بالمايكروبف وبعدين بقطعها بالنص وبطلع القلب تبعها وبخلطه وهو سخن بصحن على جنب مع شوية حليب وزبدة وملح وفلفا اسود وجبنة موزريلا.. برجع البطاطا على القشرة وبحط على الوجه   « بازيلا . درة . زيتون . مخلل خيار . نقانق . دجاج مقطع ومسلوق او مشوي « او اي شي حسب رغبتكن وملح وفلفل و مايونيز وجبنة موزريلا وبدخلها دقيقة عالمايكرويف لتسيح الجبنة و بالعاااافية

معكرونة البشاميل والدجاج ( دانية )

معكرونة البشاميل والدجاج

نسلق المعكرونة (أنا اخترت السباكيتي )

في قدر نضع  قطع دجاج صغيرة نقلبها بالزيت ونضيف عليها (ملح -فلفل-هيل ناعم- فليفلة حمراء يابسة ناعمة - بهارات ماجي - ثوم بودرة - قليل من الخل ) ونقلب إلى أن يستوي الدجاج ثم نضيف

بصل ناعم - فليفلة خضراء وممكن اضافة فليفلة ملونة ونقطع جميعهم قطع صغيرة -  فطر 

في وعاء صغير نضع ملعقتين طحين مع حليب سائل ونحركهم جيداً ثم نضيفهم على خليط الدجاج 

ونحرك باستمرار إلى أن يغلي الحليب ثم نضيف (جبنة موزريلا - بارميزان - قشقوان -شيدر) ذرة وجزر مفروم ناعم

نضيف المعكرونة بالتدريج دون التوقف عن التحريك 

نتركهم حوال 5 إلى 10 دقائق  وبعدها نسكبهم في صحن التقديم 

وألفين صحتين

شرحات مطفاية